Donderdich 11 Oktober: “De Aafslachting…”

by Posted on 16 oktober 2012 Geplaatst in Competitie, Senioren

Door Bert Geelen

En dao ginge we weer! Met volle euvertuuging om Hael 2 de kampioens aspiraties door de naas haen te baore! Ut voltallige 6 man sterke team waas d’r klaor veur (Allein Fred kwoom get laat, mer det moog op dea leaftied ;)). De ideale opstelling weardje door team captain Bennie opgesjreave en we verwachdje van ozze neet te ongersjatte teagesjtenjer neet minder!

Oet tactisch auchpuntj waerdje beslaote om met de ierste twiej dubbels te beginne. Fred en Bert teage John en Benoir (des zonne vervaelendje Franse naam, oet te spreake as Beeeniiiooooorrruuuuuhhhhh) op ut center court. Veur det dees top sporters eindelik in de wedstrijd zoote, stonge ze al met 3 – 12 achter. Noa unne redelijke comeback (17-21) woore ze beide al hun gedachte bezig met de derdje set. Mer door technische overmacht en puure aoverklasse waerdje ze in de twiejdje set compleet euverrompeltj (12- 21).

Helaas koste Bennie en Carlos, ondanks heur vastberaojenheid om deze taegestenjer alle heuk van ut veldj te laote zeen, auch gein inkele weerstandj beeje… Met un dramatische nederlaog in de ierste set (11-21) en de vernederendje 6 – 21 in de twiejde set waas dit auch al snel bekaeke.

Toen wae met de twiejde runj wooje beginne bleek d’r un opstellings probleem te zeen. Pieter stong namelik op 2 veldje tegeliek opgesteldj. Hiej zoot echter un goot oetgedachtj plan achter! Pieter is namelik zao goot, det d’r op 2 veldje tegeliek ken speele. Op ut moment det ozze taegestenjer dit zuut, zaktj um spontaan de mood inne sjaon en op dees maneer probeerdje wae de wedstrijd te keren. Helaas ging Hael 2 neet accoord en weardje we as makke lammetjes nao de slacht gebracht.

Henri en Bert waerdje in 2 sets van de baan gevaegtj (9-21 en 12-21) en Bennie samen met Pieter probeerdje ut in hun twiejde set nog recht te trekken. Mer helaas mocht dit neet baate (7-21 en 16-21).

Dao stong os Roggels trost… Kampioens aspiraties in duigen! 4 wedstrijden verlaore en nog 4 te gaon…. Det d’r nog allein singels in ut veuroetzicht woore, maakdje ut d’r neet mekkeliker op.

*****************************************************************************
De volgendje tekst is weg gekniptj om alle dramatiek en ealenj te bespaare veur de gene die neet d’r biej woore. Ut is baeter det d’r gein trauma’s waere aangekaltj.
*****************************************************************************

Met un genadeloze score van 0-8 en un te-neergeslagen team spirit, waas ut den mer weer tied om de positieve kantj van de recreanten competitie te goan be-oefenen. Nao unne lekker douche stong os eigen Renee os al op te wachten met get heerlike glaeskes Spa Goud! Hulde hiejveur!
Later op deze aovendj waerdje d’r door Fred gezwaore det we heller moste trainen, en det we ze de volgendje kier zooje pakke! Op det moment waas aederein ut dao met ins. We zulle waal zeen of dees belofte standj heltj….

Kortom: BC Roggel 1 – Hael 2: Unne pak rammel van hiej tot in Nieuw Zealandj, mer waal teambuilding en gezelligheid! Den mer veur de twiejdje plaats!

De twiejdje ronde… BC Roggel 1 – Hael 3

by Posted on 29 september 2012 Geplaatst in Competitie, Senioren

Door Bert Geelen

Nao de nederlaog (op pepeer) taege aardsrivaal Heytse waas ut moraal in ut ierste hiejre taem tot un historisch diepte punt gezaktj. Logisch auch, want dit waas ozze ierste wedstrijd dus historisch waas ut zao wie zao.

Noe twiej waeke laater waas ut den tied veur de ierste thoes wedstrijd: Roggel1 – Hael 3. Ut publiek waas den auch massaal nao Micosport.

t aafgerezen om Roggel 1 te komme aanmoedige. Ondanks de groate aantalle wil ich toch gaer ut ganse publiek persuunlik bedanke …. Dus dank aan Kinu en Jose!

De taikwando vereniging “Wae ligge allein mer oppe grondj, dus staoke de zaal nao 30 graade” maakdje netjes optied plaats veur de gladiatoren die al stonge te springe. Letterlik, want dit ganse seizoen haet Roggel nog naots zon felle warming up gedaon. Loate we ut op thoes veurdeil haoje.

De ierste dubbel ging met Fred en Bennie taege Bas en Marc. Ondanks de geweldige instelling van ut duo, en serieuze kreten van Fred moste ze de wedstrijd met twiej kier 9-21 oet henj gaeve. Henri en Bert haaje auch opstart problemen. De ierste set weardje weg gegaove met 16-21. Mer toen waas ut tied om ut roer te keren. Met un sublieme en soepele samewerking weardje de 0-1 achterstandj omgezat noa un 2-1 euverwinning met unne echte drie-setter.

Tiedens deze wedstrijd zoog Fred de kans om ziene inkel taegesjtenjer te euverompele. Noa un zwoar bevochte 1e set trok Fredje allein aan ut kortste eind met 21-23. In de 2e set haaj Bas fred in de tang en waas ut verassings element compleet oetgewerktj. Helaas.

Noe begonne Henrie en Carlos aan hun inkel partieje. Carlos waas de ierste set compleet de shuttle kwiet. D’r veele letterlik mier shuttels oet ut veldj as in ut veldj (9-21). Mer met coaching en get adviezen ging d’r de 2e set weer draan! Helaas waas ut “To little, To late” en haet d’r zich gewonne motte gaeve met 17-21.

Henri haaj sjrik veur de inkel. Vandaor det de ierste set auch kansloos noa de teagesjtenjer ging (13-21). Toen d’r noa de ierste set un bietje aan de greute van ut veldj, en de massa’s aan toejuichende toesjouwers gewindj waas, trok d’r de 2e set nao zich toe (21-17). De teagestanjer wis zich d’r geine road met, met helaas, op ut einde van de 3e en beslissendje set haai d’r Henri zien tacktiek door (wat die is, hoaje we in de midde om de concurentie neet slummer te maake den ze al zeen). Met 18-21 trok Roggel helaas aan ut korte eind. Henri voegdje d’r later in ut kleidlokaal aan toe: “Da viel muh nog reuuujze meeh, da had veul ergur kunne ziejn”.

Vervolges waas Bert aan zet taege un aod klasgenootje. Bert haaj al weer ff langs de kantj gestange en ut deurdje dus weer ff veur det de diesel op gang waas. Ierste set ging nao Tymen. De 2e set ging stukke baeter, ondanks det Bert minimaal 10 service haaj oet geslaage won d’r toch met ruume cijfers (21- 9).
De 3e set braok aan veur Bert (3 setter) Geelen. In dees set waas d’r veural taege zich zelf aant speele. Nao ontelbaare foute service en oet shuttles trok d’r den toch eindelik de winst nao zich toe (21-18).

Met nog 2 partieje te gaon stong ut dus 2-4 veur de bezeukers oet Hael. D’r waas nog oetzicht op un geliek spel. De wedstrijden stardje tegeliek om 22:00 oor. Bennie en Bert probeerdje alles wat in hun macht loog om deze pot te winne. Helaas haaj Bennie last van un ruk blessure en waas ut B&B duo genoodzaaktj om met un veur auchter systeem te speele. De taegestenjer maakdje hiej dankbaar geboek van en won met 2 sets relatief mekkelik (12-21 en 15-21).

De angere pot met Carlos en Fred zoog d’r stukke baeter oet. De soepele same werking en de 2 jonge hindes die euver de baan vlooge wiste de pot redelik mekkelik te winne (21-12 en 21 – 13).

Officiele eind oetslaag BC Roggel 1 – Hael 3: 3-5

Zao as gae kentj zeen is det al weer un veuroet gang ten opzichte van de veurige kier. Un simple extrapolatie van de resultaten gaeftj aan det wea volgendje kier geliek speele en euver 2 wedstrijden gaon winne. As we dit noe al invullen in de rangliest betijkentj ut det ut kampioensjap al binne is!

Op nao de volgendje taegestenjer, Hael 2!